Nderohet oficeri jugosllav që refuzoi të bombardonte Kroacinë

Zyrtarët malazezë dhe kroatë zbuluan të hënën një monument në ishullin kroat Vis për një oficer detar jugosllav që refuzoi të bombardonte qytetet në bregdetin e Kroacisë në luftën e vitit 1991.

Një pllakë përkujtimore për oficerin detar të Ushtrisë Popullore Jugosllave, Vladimir Baroviç, u zbulua të hënën në ishullin Vis në Kroaci.

Baroviç kreu vetëvrasje më 29 shtator 1991 pasi refuzoi urdhrat nga shtabi i Ushtrisë Popullore Jugosllave për të bombarduar qytetet në bregdetin Adriatik të Kroacisë.

Gjatë ceremonisë, përfaqësuesit e qeverisë malazeze dhe kroate përshëndetën aktin e Baroviçit si pjesë të historisë universale të nderit dhe njerëzimit.

“Ndjenja e nderit të Baroviçit nuk e lejoi atë të bombardonte qytetet bregdetare në Dalmaci kur u urdhërua ta bënte këtë. Siç tha ai, “malazezët nuk mund të luftojnë dhe të shkatërrojnë një komb që nuk ka bërë asgjë të keqe”, tha Ministri i Mbrojtjes i Malit të Zi, Rasko Konjeviç.

Si komandant i sektorit ushtarako-detar të Pulës në Kroaci, Baroviç mori pjesë në negociatat për tërheqjen e Ushtrisë Popullore Jugosllave nga ai qytet në vitin 1991.

Media raportoi se, gjatë atyre negociatave, Baroviç tha se qytetet kroate nuk do të sulmoheshin ndërsa ai ishte në komandë.

Pasi u urdhërua të bombardonte qytetet bregdetare në Kroacinë veriore nga anijet e tij, Baroviç dha dorëheqjen dhe më pas kreu vetëvrasje.

Sipas raportimeve të mediave, në shënimin e tij vetëvrasës, ai shkroi se kishte “vendosur të vdiste me dinjitet sepse malazezët nuk mund të luftojnë dhe të shkatërrojnë një komb që nuk kishte bërë asgjë të keqe”.

Në korrik 2016, presidenti malazez Filip Vujanoviç nderoi pas vdekjes Baroviçin me Urdhrin e vendit për Trimëri.

Si pjesë e Jugosllavisë, Mali i Zi mori pjesë drejtpërdrejt në luftërat në Kroaci dhe Bosnje e Hercegovinë nën udhëheqjen e Sllobodan Millosheviçit të Serbisë, megjithëse nuk pa asnjë konflikt në tokën e tij.

Nga dhjetori 1991, Ushtria Popullore Jugosllave, duke përfshirë një numër të madh ushtarësh dhe rezervistësh malazezë, rrethuan qytetin kroat të Dubrovnikut dhe rajonin e afërt të Konavles për nëntë muaj.

Qyteti i vjetër i Dubrovnikut, një vend trashëgimie botërore nga UNESCO, pësoi dëme serioze gjatë bombardimeve.

Në vitin 2000, Milo Djukanoviç, në atë kohë kryeministër i Malit të Zi, i kërkoi zyrtarisht falje Kroacisë për vuajtjet dhe humbjet që kishin shkaktuar ushtarët malazezë, veçanërisht në zonën e Dubrovnikut.

Që kur u bë i pavarur në vitin 2006, Mali i Zi ka mbajtur vetëm tetë gjyqe për krime lufte të kryera në Kroaci, Bosnjë dhe Hercegovinë dhe Kosovë, por vetëm autorët e nivelit të ulët janë ndjekur penalisht.

Samir Kajošević

Teksti Nderohet oficeri jugosllav që refuzoi të bombardonte Kroacinë u botua fillimisht më Balkan Insight/Balkan Transitional Justice