Raportin “Mbrojtja e Dëshmitarëve në Republikën e Kosovës”

Pas një hulumtimi disa mujor, Qendra për Hulumtim, Dokumentim dhe Publikim (QHDP) ka publikuar raportin “Mbrojtja e Dëshmitarëve në Republikën e Kosovës”

Është shqyrtuar literatura përkatëse, ligjet a aplikueshme lidhur me mbrojtjen e dëshmitarëve dhe janë zhvilluar intervista me akterët kryesorë institucionalë të lidhur me çështjen në fjalë.

Qendra për Hulumtim, Dokumentim dhe Publikim (QHDP) ka konstatuar se gjendja aktuale e sistemit të drejtësisë në Kosovë nuk është e favorshme për dëshmitarët, duke pasur parasysh rastet e dështimit të proceseve gjyqësore si pasojë e zbulimit të dëshmitarëve përgjatë atyre proceseve.

Gjithashtu të intervistuarit tanë i kanë konfirmuar vështirësitë në mbrojtjen e dëshmitarëve dhe funksionalizimin e një sistemi që do të siguronte mbrojtjen pavarësisht çfarëdo rrethane.

Pavarësisht që Kosova nuk është një shtet i pasur, duke pasur parasysh situatën e paraqitur në raporte ndërkombtare sa i përket krimit të organizuar, dështimit të gjykimeve për krime lufte si pasojë e mbrojtjes joadekuate të dëshmitarëve etj., pasja e një sistemi funksional të mbrojtjes së dëshmitarëve duhet të jetë prioritet i Republikës së Kosovës.

QHDP ka nxjerrë disa rekomandime me rëndësi për t’i adresuar mangësitë kryesore të sistemit të drejtësisë në rrafshin e mbrojtjes së dëshmitarëve.

Një nga këto rekomandime është krijimi i një procedure standarde të financimit për raste të veçanta gjë e cila duhet të jetë një prioritet i Ministrisë së Drejtësisë, Ministrisë së Punëve të Brendshme dhe Ministrisë së Financave. Për ta pasur një sistem funksional të drejtësisë, gjë që është zanafilla e shtetit të së drejtës, financat për të duhet të jenë poashtu prioritare në ndarjet e buxhetit.

QHDP u bënë thirrje edhe njëherë të gjithë akterëve që ta marrin me seriozitetin e nevojshëm çështjen në fjalë, ashtuqë Kosova të jetë në gjendje ta përmbushë obligimin e saj kushtetues për sundim të ligjit si dhe t’u përmbahet obligimeve ndërkombtare që lidhen me Drejtësinë Tranzicionale e që janë poashtu kusht i BE-së për integrime të mëtutjeshme. (Gazeta Lajm, 15.09.2015.)

Mbrojtja e Dëshmitarëve në Republikën e Kosovës (bilingual publication in PDF)